हरिः ओम्

Sloka Text in Telugu , Kannada, Gujarati, Devanagari, English

સુન્દરકાણ્ડ.
અથ અષ્ટષષ્ટિતમસ્સર્ગઃ||

અથાહ મુત્તરં દેવ્યા પુનરુક્તઃ સસંભ્રમઃ|
તવ સ્નેહાન્નરવ્યાઘ્ર સૌહાર્દાદનુમાન્યવૈ||1||

એવં બહુવિધં વાચ્યો રામો દાશરથિસ્ત્વયા|
યથા મામાપ્નુયાત્ શીઘ્રં હત્વા રાવણમાહવે||2||

યદિ વા મન્યસે વીર વસૈકાઽહ મરિંદમ|
કસ્મિંશ્ચિત્ સંવૃતે દેશે વિશ્રાંતઃ શ્વોગમિષ્યસિ||3||

મમચાલ્પભાગ્યાયાઃ સાન્નિધ્યાત્ તવ વીર્યવાન્|
અસ્ય શોકવિપાકસ્ય મુહૂર્તં સ્યાદ્વિમોક્ષણમ્||4||

ગતે હિત્વયિ વિક્રાંતે પુનરાગમનાયવૈ|
પ્રાણાનામપિ સંદેહો મમસ્યાન્નાત્ર સંશયઃ||5||

તવાદર્શનજ શ્શોકો ભૂયો માં પરિતાપયેત્|
દુઃખાદ્દુઃખ પરાભૂતાં દુર્ગતાં દુઃખભાગિનીમ્||6||

અયં ચ વીર સંદેહઃ તિષ્ઠતીવ મમાગ્રતઃ|
સુમહાંસ્ત્વત્ સહાયેષુ હર્યૃક્ષેષુ હરીશ્વર||7||

કથં નુ ખલુ દુષ્પારં તરિષ્યંતિ મહોદધિમ્|
તાનિ હર્યૃક્ષસૈન્યાનિ તૌ વા નરવરાત્મજૌ||8||

ત્રયાણામેવ ભૂતાનાં સાગરસ્યાસ્ય લંઘને|
શક્તિઃ સ્યાદ્વૈનતેયસ્ય તવ વા મારુતસ્ય વા||9||

તદસ્મિન્ કાર્ય નિર્યોગે વીરૈવં દુરતિક્રમે|
કિં પશ્યસિ સમાધાનં બ્રૂહિ કાર્યવિદાં વર||10||

કામમસ્ય ત્વમેવૈકઃ કાર્યસ્ય પરિસાધને|
પર્યાપ્તઃ પરવીરઘ્ન યશસ્યસ્તે બલોદયઃ||11||

બલૈઃ સમગ્રૈર્યદિ માં હત્વા રાવણમાહવે|
વિજયી સ્વાં પુરીં રામો નયેત્ તસ્યાદ્યશસ્કરમ્||12||

યથાઽહં તસ્ય વીરસ્ય વનાદુપથિના હૃતા|
રક્ષસા તદ્ભયા દેવ તથા નાર્હતિ રાઘવઃ||13||

બલૈસ્તુ સંકુલાં કૃત્વા લંકાં પરબલાર્દનઃ|
માં નયેદ્યદિ કાકુત્‍સ્થઃ તત્ તસ્ય સદૃશં ભવેત્||14||

તદ્યથા તસ્ય વિક્રાંતમનુરૂપં મહાત્મનઃ|
ભવત્યાહવશૂરસ્ય તથા ત્વમુપપાદય||15||

તદર્થોપહિતં વાક્યં પ્રશ્રિતં હેતુસંહિતમ્|
નિશમ્યાહં તતશ્શેષં વાક્ય મુત્તરમબ્રુવન્||16||

દેવી હર્યૃક્ષ સૈન્યાનાં ઈશ્વરઃ પ્લવતાં વરઃ|
સુગ્રીવઃ સત્ત્વસંપન્નઃ તવાર્થે કૃત નિશ્ચયઃ||17||

તસ્ય વિક્રમસંપન્નાઃ સત્ત્વવંતો મહાબલાઃ|
મનઃ સંકલ્પસંપાતા નિદેશે હરયઃ સ્થિતાઃ||18||

યેષાં નોપરિનાધસ્તાન્ નતિર્યક્ સજ્જતે ગતિઃ|
ન ચ કર્મસુ સીદંતિ મહત્સ્વમિત તેજસઃ||19||

અસકૃત્તૈર્મહાભાગૈઃ વાનરૈર્બલદર્પિતૈઃ|
પ્રદક્ષિણીકૃતા ભૂમિ ર્વાયુમાર્ગાનુસારિભિઃ||20||

મદ્વિશિષ્ઠાશ્ચ તુલ્યાશ્ચ સંતિ તત્ર વનૌકસઃ|
મત્તઃ પ્રત્યવરઃ કશ્ચિન્નાસ્તિ સુગ્રીવ સન્નિધૌ||21||

અહં તાવદિહ પ્રાપ્તઃ કિં પુનસ્તે મહાબલાઃ|
નહિ પ્રકૃષ્ટાઃ પ્રેષ્યંતે પ્રેષ્યંતે હીતરે જનાઃ||22||

તદલં પરિપાતેન દેવિ મન્યુર્વ્યપૈતુ તે|
એકોત્પાતેન વૈ લંકા મેષ્યંતિ હરિયૂથપાઃ||23||

મમપૃષ્ઠગતૌ તૌ ચ ચંદ્રસૂર્યાવિવોદિતૌ|
ત્વત્સકાશં મહાભાગે નૃશિંહવાગમિષ્યતઃ||24||

અરિઘ્નં સિંહસંકાશં ક્ષિપ્રં દ્રક્ષ્યસિ રાઘવં|
લક્ષ્મણં ચ ધનુષ્પાણિં લંકાદ્વારમુપસ્થિતમ્||25||

નખદંષ્ટ્રાયુધાન્ વીરાન્ સિંહશાર્દૂલવિક્રમાન્|
વાનરાન્ વારણેંદ્રાભાન્ ક્ષિપ્રં દ્રક્ષ્યસિ સંગતાન્||26||

શૈલાંબુદનિકાશાનાં લંકામલયસાનુષુ|
નર્દતાં કપિમુખ્યાનાં અચિરાચ્છ્રોષ્યસિ સ્વનમ્||27||

નિવૃત્ત વનવાસં ચ ત્વયા સાર્થ મરિંદમં|
અભિષિક્ત મયોધ્યાયાં ક્ષિપ્રં દ્રક્ષ્યસિ રાઘવમ્||28||

તતો મયાવાગ્બિરદીનભાષિણા
શિવાભિરિષ્ટાભિરભિપ્રસાદિતા|
જગામ શાંતિં મમમૈથિલાત્મજા
તવાપિ શોકેન તદાઽભિપીડિતા||29||

ઇત્યાર્ષે શ્રીમદ્રામાયણે આદિકાવ્યે વાલ્મીકીયે
ચતુર્વિંશત્ સહસ્રિકાયાં સંહિતાયામ્
શ્રીમત્સુંદરકાંડે અષ્ટષષ્ટિતમસ્સર્ગઃ||
શ્રીસુન્દરકાણ્ડ સમાપ્તઃ||
હરિ ઓમ્ તત સત્||
સર્વં શ્રી રામચંદ્રાર્પણમસ્તુ||

|| Om tat sat ||